O PSdeG-PSOE de Foz denuncia a indignación dos veciños coa limitación de estacionamento en Eduardo Pondal

O PSOE de Foz vén de constatar o pintado dunha banda amarela en toda a marxe esquerda da rúa Eduardo Pondal, suprimindo numerosas prazas de estacionamento en liña.

                 

Os veciños achegáronnos numerosas queixas por esta prohibición, xa que non hai constancia de ningún problema de tráfico nesta rúa que xustifique a decisión adoptada. 

Moitos vehículos paraban nesa marxe para deixar aos nenos e nenas que estudan no Colexio Nº 1, agora o Alcalde obrígaos a cruzar a rúa, co risco na seguridade que iso ten.

                 

Desde hai un tempo en Foz estanse a suprimir numerosas prazas de aparcamento e non se ofrecen alternativas: os solares que se habilitaron, con firme de zahorra e mala accesibilidade, son fincas particulares que en calquera momento se poden edificar.

                

É unha tras outra, en Foz non se planifica nada, cada xestión da Alcaldía xera un problema novo onde non o había.

                 

Hai alternativas, valentes, para habilitar espazos de estacionamento no solar do SAREB ou nas fincas da Horta do Cura, pero hai que ter vontade e unha visión a medio e longo prazo.

                 

Desde o PSOE opinamos que xa é hora de que alguén con visión planifique o pobo e pense as consecuencias das decisións, xa é hora de que algo de SENTIDO COMÚN impere no Concello.