Unha rúa sen tendas, sen comercios, sen vida, sería unha rúa morta.

O PSdeG - PSOE de Foz denuncia o caos e o fracaso do alcalde na “peatonalización” da Avenida da Mariña.

O sentido común, o menos común dos sentidos do Alcalde de Foz. O PSOE de Foz quere poñer en valor as reclamacións dos comerciantes da Avenida da Mariña. Tras moitas conversas, estamos constatando o temor existente entre moitos comerciantes ante o futuro da calle cando esta volva a ser peonil, xa que as vendas resentíronse moitísimo no período que a rúa estivo pechada ao tráfico. Houbo comercios que incluso se marcharon de alí, como tendas de roupa ou unha coñecida confitería.

                 

É inaudito que se deseñe unha rúa para paso de vehículos, con zonas de aparcamento enfocadas aos usuarios do comercio, e de un día para outro sen ningún estudio nin criterio, se decida pechar de forma unilateral ao paso dos vehículos.

                 

É fundamental humanizar e peatonalizar o centro de Foz, pero cunha planificación e un deseño que permita compatibilizar as necesidades de tódolos veciños. Unha rúa sen tendas, sen comercios, sen vida, sería unha rúa morta.

                

A Rúa do Pilar non é viable como arteria principal. Ten problemas estructurais, non presenta ancho suficiente nin beirarrúas e hai outros condicionantes como a presencia dun colexio.

               

Non entendemos como con esta problemática o alcalde sigue defendendo o peche ao tráfico da Avenida da Mariña, imposible neste momento. Unha previsión adecuada podería permitir un cambio de uso nun futuro, pero neste momento NON é posible. 

 
O PSOE ven de constatar que coa configuración e o deseño actual a Avenida da Mariña funciona moito mellor co paso de vehículos, tal e como estaba proxectada e se reformou no Proxecto Construtivo.

              

A conclusión que sacamos é que o Alcalde erra nos seus plantexamentos, porque non escoita ou non quere escoitar aos veciños. E unha vez errado, é incapaz de recoñecelo e corrixir unha decisión a todas luces errónea, equivocada e inasumible. 

Seguiremos defendendo un estudo integral de mobilidade e de tráfico en Foz, onde faga falta, cuestión que polo que se ve non é prioritaria para o actual rexedor do Concello.